Kuwa 25 Gicurasi 2026, mu Murenge wa Gahanga, Akarere ka Kicukiro, hatangirijwe ku mugaragaro icyumweru cyahariwe imbonezamikurire y’abana bato n’imirire myiza.

Iki gikorwa cyabereye ku Kigo cy’Imbonezamikurire cya Nazarene ECD, giherereye mu Kagari ka Gahanga, cyitabirwa n’Umuyobozi Nshingwabikorwa  w’Akarere ka Kicukiro wungirije Madamu HUSS Monique , abayobozi b’inzego z’ibanze, inzego z’umutekano, abajyanama b’ubuzima, ababyeyi n’abarezi b’abana ndetse n’abafatanyabikorwa batandukanye.

Insanganyamatsiko y’iki cyumweru iragira iti:
“Duharanire gutura mu Mudugudu uzira igwingira n’imirire mibi, duteza imbere imikurire myiza y’abana.”

Iki gikorwa cyabimburiwe no gutera imboga mu karima k’igikoni, gupima abana hagamijwe kureba imikurire yabo ndetse no gusobanurira ababyeyi uko bategura indyo yuzuye.

Ubuyobozi bw’umufatanyabikorwa w’Akarere mu guteza imbere Imbonezamikurire y’abana bato “Reach The Children Rwanda” bwasobanuye ko Imbonezamikurire y’umwana ishingiye ku mutekano we, gukangura ubwonko bwe binyuze mu bigo Mbonezamikurire, kumuha indyo yuzuye, kumukingiza no kwita ku isuku ye. banakanguriye ababyeyi kurangwa n'imyitwarire myiza  kuko ari bo abana bareberaho.

Umuyobozi Nshingwabikorwa w’Akarere ka Kicukiro wungirije Madamu HUSS Monique, yashimye uruhare rw’ababyeyi, abarezi ndetse n’abajyanama b’ubuzima ku bwitange bagaragaza mu guteza imbere imibereho myiza y’abana n’iterambere ry’Igihugu muri rusange. Yanashimiye umufatanyabikorwa “Reach The Children Rwanda” ku nkunga batanga mu guteza imbere ibikorwa by’imbonezamikurire mu karere.

Yibukije ababyeyi akamaro ko kugaburira abana indyo yuzuye, kubajyana kwa muganga no kubungabunga umutekano wabo. Yanabashishikarije kujyana abana mu bigo Mbonezamikurire kugira ngo birinde ihohoterwa n’ubuzererezi. Yasabye kandi inzego bireba gukomeza kuzuza inshingano zazo. Ati “Aba bana bacu ni bo bayobozi b’ejo hazaza b’Igihugu cyaco, biragoye rero ko umwana wagwingiye yagirira akamaro Igihugu, ni yo mpamvu tubibutsa guharanira ko aba bana babona indyo yuzuye kandi ibikenewe byose turabifite aho dutuye, uruhare rw’Umubyeyi ni ingenzi kandi natwe tuzakomeza kubaba hafi nk’Ubuyobozi”.

Biteganyijwe ko ubu bukangurambaga buzarangira ku wa 29 Gicurasi 2026. Muri iki cyumweru hazakomeza ibikorwa byo gukurikirana abana bagaragaye mu murongo utukura w’imirire mibi ndetse no gukomeza gupima abana hagamijwe guteza imbere imikurire yabo.