Kuri uyu wa Kabiri Tariki 02 Kamena 2026, icyumweru cyahariwe Imbonezamikurire y’abana bato n’imirire cyasorejwe ku kigo cy’Imbonezamikurire y’abana bato cya “Centre Communautaire Hope” giherereye mu Kagari ka Karugira, Umurenge wa Kigarama, Akarere ka Kicukiro.

Iki gikorwa cyitabiriwe n’Umuyobozi Nshingwabikorwa Wungirije w’Akarere ka Kicukiro Madamu HUSS Mnique ,abafatanyabikorwa batandukanye, inzego z’umutekano, abajyanama b’ubuzima, ababyeyi ndetse n’abarezi b’abana.

Mu butumwa bwatangiwe muri uyu muhango, ababyeyi bibukijwe akamaro ko kwita ku mikurire myiza y’abana babo, kubarinda ihohoterwa iryo ari ryo ryose, kubaha indyo yuzuye no kubungabunga umutekano wabo. Banasabwe gushyira imbaraga mu kurwanya igwingira ndetse no kwirinda amakimbirane mu miryango, kuko bigira ingaruka zikomeye ku mikurire no ku mibereho myiza y’umwana.

Madamu HUSS Monique Umuyobozi Nshingwabikorwa wungirije w’Akarere ka Kicukiro, yashimiye abafatanyabikorwa bose bagize uruhare mu bikorwa byaranze iki cyumweru, ndetse anashimira abajyanama b’ubuzima ku bwitange n’umusaruro bakomeje kugaragaza mu bikorwa byo guteza imbere imibereho myiza y’abana n’imiryango.

Yagize ati: “Turashimira abafatanyabikorwa bose n’abajyanama b’ubuzima bakoze  akazi k’indashyikirwa muri iki cyumweru, turasaba ababyeyi gukomeza gutanga umusanzu usabwa kugira ngo abana babo barererwe mu ngo Mbonezamikurire kandi bubake imiryango itekanye abana bakuriramo neza”.

Yakomeje yizeza abaturage ko Akarere ka Kicukiro kazakomeza gufatanya na bo mu bikorwa bigamije guteza imbere imibereho myiza y’abana no kubafasha kugera ku mikurire iboneye.

Mu gusoza uyu muhango, Madamu HUSS Monique yageneye abana ibiryamirwa ndetse anasangira na bo ifunguro rigizwe n’indyo yuzuye, mu rwego rwo gushimangira ubutumwa bwo guteza imbere imirire myiza y’abana bato.

Iki cyumweru cyahariwe Imbonezamikurire y’abana bato n’imirire cyari gifite Insanganyamatsiko igira iti: “duharanire gutura mu Midugudu izira igwingira n’ imirire mibi duteza imbere imikurire y’abana”.